ភ្នំពេញ៖ រដ្ឋបាលរាជធានីភ្នំពេញ រកឃើញបុគ្គលិកអប់រំ ២៤នាក់មានផ្ទុកជំងឺកូវីដ-១៩ ក្នុងចំណោមបុគ្គលិកអប់រំសរុប ជាង១ម៉ឺននាក់ ដែលបានធ្វើតេស្តនៅថ្ងៃនេះ។

ក្នុងសេចក្ដីប្រកាសព័ត៌មានចុះថ្ងៃទី១៤ ខែកញ្ញានេះ សាលារាជធានីភ្នំពេញ ឱ្យដឹងថា ក្នុងយុទ្ធនាការធ្វើតេស្តរកជំងឺកូវីដ-១៩ មុនពេលបើកដំណើរការសាលារៀនឡើងវិញលើក្រុមគ្រូបង្រៀន និងបុគ្គលិកអប់រំចំនួន ១០ ៤៤៣នាក់ បានរកឃើញគ្រូបង្រៀន និងបុគ្គលិកអប់រំ ២៤នាក់ទទួលលទ្ធផលវិជ្ជមានកូវីដ-១៩ ដែលស្មើនឹង ០,២៣ភាគរយ។

ក្នុងលិខិតនោះសរសេរផងដែរថា ដោយសារបុគ្គលិកអប់រំទាំង ២៤នាក់បានចាក់វ៉ាក់សាំងការពារជំងឺកូវីដ-១៩រួច ដូច្នេះពួកគេមានសុខភាពល្អធម្មតា និងមិនមានរោគសញ្ញាធ្ងន់ធ្ងរឡើយ ហើយក៏ត្រូវបានមន្ទីរសុខាភិបាលបញ្ជូនទៅទទួលការព្យាបាលផងដែរ។

បើតាមសាលារាជធានីភ្នំពេញ នៅថ្ងៃទី១៥ ខែកញ្ញា ស្អែកនេះ មានសាលាទាំងឯកជន និងសាធារណៈចំនួន ២២៧ទីតាំង នឹងត្រូវបើកឱ្យដំណើរការឡើងវិញ ដែលមាន លោកគ្រូ អ្នកគ្រូ និងបុគ្គលិកអប់រំបម្រើការងារចំនួន ១០ ៤៤៣នាក់ និងសិស្សានុសិស្សត្រូវចូលរៀនវិញជិត ១៤ម៉ឺននាក់៕